日前有女子疑酒後駕駛，遇上意外後拒絕「吹波波」兼兜巴星到場調查嘅交通警員，事件令公眾嘩然，警隊一哥都大嘆掌摑警員唔尊重執法人員，感到好遺憾。可能唔想再有警員受到咁嘅對待，警方交通總部道路安全總督察朱敏華噚日出席香港理性飲酒促進會成立大會，呼籲市民理性啲，切勿醉駕。
酒商不擔心銷量
促進會由本港多個酒商聯合成立，成員代表全港逾八成啤酒、七成國際烈酒及四成葡萄酒商品牌，主席杜吳瑞麗話會印製五萬張「酒後勿駕駛」貼紙，免費分派畀酒吧、食肆，貼喺廁所、出入口當眼處，等啲飲酒嘅人有所警惕，杜吳瑞麗話唔擔心咁做會令酒類銷量下跌，司機反而可能因為酒後唔揸車而放開懷抱飲多幾杯。
酒能亂性，點樣可以理性地飲酒，八方都好想知道，可惜促進會對如何宣揚理性飲酒大賣關子，話稍後會搞啲社區活動做教育工作，第二步會設立網頁呼籲不要醉駕，呢個網頁唔知會唔會提供警方隨機「吹波波」路障位置吸引劉伶睇呢？