阿爺「解放」香港無孔不入，近日重點對象可能係記者協會。雖然記協由前線記者組成，不過記者卻不太熱衷入會，但係近日出現異常情況，據講頻頻有講普通話嘅人，聲稱是某社團報章或某公司內部刊物記者，查詢入會手續，有人更話有成百個「同事」想入會；忽然間其門如市，有景轟啦。
會章規定需會員推薦
本來多收會員對記協係好事，之不過如果入會者都係「上面」嘅人，或者唔係本港主流傳媒記者，有人覺得可能反而扭曲記協代表性；而忽然咁多人想入會，有人覺得可能同「記者」呢個身份有價有關，事關內地記者收「紅包」幾乎係行規，不能排除有人想博大霧入會後四出攞着數。
亦有記協中人提出一個大膽推測，懷疑可能同年中執委會改選有關。據講現任主席麥燕庭會退下來交棒新人，目前新領導層未成形，假如有人想左右大局，就要把握機會入會，待改選時做嘢。萬一真係有成百個內地同胞入會，佢哋眾志成城「起義」嘅話，記協隨時就此「赤化」。
有42年歷史嘅記協，立場向來比較批判建制，幾年前反對23條態度鮮明，同左派嘅香港新聞工作者聯會涇渭分明，若然記協真係變天，情況難以想像，好彩記協會章規定入會申請需一名會員推薦，仲要執委會通過，因此亦有記協中人認為，要解放記協都唔係一朝一夕做得到嘅事。
根據記協會章，記協分四類會員，分別係正式會員、附屬會員、公關會員同學生會員，前三種會員均有投票權，而屬於邊類會員，簡單嚟講就係視乎係咪新聞機構全職員工，全職者自然係正式會員，兼職可以做附屬會員，做PR就係公關會員。
失業獲審批可領津貼
好多行家對記協疑似成為滲透目標十分緊張，為咗唔想記協被解放，一直懶懶閒唔志在入會嘅記者都話要急急填表交會費，有記協執委就同八方講，其實入記協好着數，事關失業會員經審批可獲每月3,000蚊津貼最多半年，呢樣福利連有祖國撐腰嘅工聯會都冇o架！
mailto:[email protected]