美國前財長保爾森（HenryPaulson）本新書《OnTheBrink》噚日正式出街，封面講到明會爆佢拯救環球金融業嘅內幕，喺雷曼出事嗰陣，佢係花旗國嘅金融總指揮，呢本書當然有睇頭，華華都唔執輸，四圍八吓佢本新作有咩料爆。
叫老婆幫自己國家祈禱
本書主要係講雷曼「死前」48小時發生嘅事，雖然好多內容係舊聞，但華華仍然睇得津津有味，特別係英國政府從中作梗，令巴克萊救雷曼單嘢臨尾香嗰Part，就最令人不勝欷歔。保爾森仲自爆話，覺得好似俾英國人跣咗鑊，仲話俾雷曼搞到無覺好瞓，差啲要食安眠藥，但最終因為信仰關係無食到，惟有靠禱告。
外表硬朗嘅保爾森一知道雷曼返魂乏術，竟然即刻打畀老婆話唔知點算，仲叫佢老婆幫自己同國家祈禱，估唔到佢咁感性喎。
揭俄國掟兩房債券陰謀
保爾森仲大爆俄國陰謀，原來早喺08年京奧舉行時，俄國佬就諗住拉攏中國，齊齊狂掟房利美同房貸美嘅債券，逼美國佬出手打救兩房，不過俾中國拒絕咗。俄國雖然唔認，但佢哋喺08年的確係賣晒兩房債券，究竟有無做過，讀者自己諗啦！
李華華
mailto:[email protected]