李嘉欣同老公許晉亨早排去咗拍拖度假，出埠過咗一個白色聖誕兼新年，所以嘉欣有成個半月冇公開露面嘞。噚日佢兩個入咗沙田睇跑馬，許晉亨名下嘅愛駒醉味喺第10場出賽，而老竇許世勳嘅賞惑就跑第9場。
跟實老爺奶奶
嘉欣出埠前曾經講過唔會刻意避孕，仲希望上天賜小孩畀佢，冇見一輪嘅嘉欣，噚日着咗一件斗篷款嘅外套，腰肚位置鬆鬆哋遮住，不過雙腿同面頰依然瘦削，唔知今次外遊佢哋成功造人未？嘉欣同許晉亨喺沙圈內恩愛咁十指緊扣，不時同友人笑住傾偈，佢兩公婆又一直跟住許世勳夫婦四圍行，一家四口樂也融融睇跑馬，不過許晉亨嘅愛駒最終跑第二，冇機會拉頭馬。
霍家加國度歲
噚日又係Kent&Curwen百周年紀念盃嘅日子，霍啟山、潘楚穎、趙雅芝、苗僑偉都有入場試吓手風，霍啟山透露新年成家去加拿大溫哥華，佢話：「去冬季奧運會，因為爹哋係2月14日生日，所以一齊去。」全家去包唔包括郭晶晶？啟山說：「唔知喎！」問佢哥哥啟剛今年結婚？啟山就話：「未有消息，唔係好清楚，你哋問番佢啦。」
