杜琪峯執導的新片《奪命金》日前正式開鏡，主要演員劉青雲、任賢齊與何韻詩等都有出席。其間阿詩自言已摸清杜琪峯底牌，認為他不是傳聞中的兇惡，但青雲及小齊即作出糾正，揚言杜導「真係好惡」。
何韻詩一直盼望可以與杜琪峯合作拍戲，今年終於夢想成真，在阿杜新作《奪命金》中擔正做女主角，開拍前兩個月，她還擔心開工時會被導演罵，因為一直聽說導演罵人很兇，不過經過幾天的相處，她又發現導演很有禮貌。
「粗口鬧人冇重複」
日前阿詩在觀塘參與《奪》片開鏡禮時笑言：「我發現導演平時喺片場其實只係扮惡，佢都幾有禮貌、幾友善，我已經睇穿佢嘅底牌，家唔驚啦，我仲發覺導演其實好爆笑，成日突然間爆兩句笑話出嚟㖭！」
雖然阿詩對杜導有這個看法，但在旁的劉青雲與任賢齊並不認同，青雲表示：「當你覺得杜導爆笑時，係因為你從來都只係接觸到佢嘅表面，佢真係好惡o架！」
小齊更吐真言：「我第一次拍佢嘅戲時，就覺得佢好犀利，佢可以一路講粗口鬧人鬧十幾分鐘都冇重複過一句，佢又會自己發明啲粗口，好搞笑，但大家都唔敢笑，所以其實佢係一個好有童心、好認真同要求好高的導演。」
角色話改就改
最後青雲嚴肅地說：「我提議大家做訪問時，盡量唔好講咁多關於導演嘅嘢！如果唔係啲新聞出咗街之後，你再拍時就知道個導演唔同！」青雲還爆料說：「我唔怕同你哋講，好多年前我曾經拍過《奪命金》幾日，當時我個角色係講我係一個為生活乜嘢都夠膽做嘅人，唔知家開鏡之後會唔會改。」
撰文：葉雪
