雖然個市越嚟越難炒，但無損散戶雅興，周末仍見散戶積極參與各大投資講座，唔怪得恒指每次跌穿兩萬點都有咁多好友支持，衝勁十足裝腔作勢扮勁扮反彈，可惜英雄過得到20400點都難過20800關。散戶心知肚明個市要跌，但又忍唔住手痕要買嘢，最慘係撈底買牛證博彈嗰班。
個市一路跌，老散一路買，之前食髓知味，養成逢低必吸習慣，但呢次1月大震盪，單月便跌咗8%，係金融海嘯以來跌得最急。既然明知入市要捱價，真係好想問吓點解咁都唔肯買Put做淡？炒友告之，近期嘅Put其實十分好炒，總之即市當玩「扑儍瓜」，見到好似20400呢類阻力位就一棍扑落去，比起逆市做好倉順手得多。
大家多數未必有時間留意個別股份嘅盤路，往往見到股價升就走埋去趁吓熱鬧。有部份半新股，好似中國高精密（591），即市走勢彷彿好似有無形之手協助，往往逆市有得升，睇圖表好吸引，但只要坐喺報價機前15分鐘留意盤路走勢，不難發覺「狂派」再現，用少少錢托起股價一路派，派派吓成交自然大，又會有更多人入場玩音樂椅。
春江鴨掃雅居樂C輪
相反，唔想受散戶玩嘅有新股南戈壁（1878），首日股價破底跌超過一成，原因係散戶太驚亂沽貨，人踩人慘劇就係咁發生。基金大戶見到咁當然開心，即使係保薦人都任得佢跌，跌殘再買上，於是低位105.60元可以彈番上112元收市。
你話呢隻股係咪咁差，我又覺得唔係囉，只係首日價比較波動，買盤較疏，好容易一跳跳幾格，但散戶就以為係大跌先兆，扮勁狂沽貨。下次沽貨前，唔該睇睇買賣兩邊排隊嘅陣容，同成咗出嚟嘅股數，咪知邊個沽緊，邊個大手吸緊。
跌市唔係冇賺錢機會，除咗做淡，留意吓盤路，仲可以睇吓異動窩輪資金流向。上周四突然有人狂掃雅居樂（3383）Call輪，適逢港交所（388）資料顯示，佢今個月已進行多次回購，公司早前又公佈09年銷售超標22%，海南項目大收旺場，會唔會係有鴨仔等緊發盈喜前入貨？
胡孟青