與老總Ｓ多時不見，佢仍然好關心香港時事發展，有咗互聯網之後，老總Ｓ人在西雅圖，對香港新聞瞭如指掌，佢認為「全民起義」四字予人口實，畀個藉口人哋猛攻，可惜也，如果改為「全民參與」，仍然可以宣傳，但就可以避免一啲不必要嘅口舌之爭。
教授Ｌ曾在TVB工作，在加州教書，於二○○一年九一一嗰日到西雅圖UW上工，至今匆匆八年有多，對西雅圖之景點，熟到似一位老練導遊，問佢點解知咁多嘢，教授Ｌ話：「教數碼媒體課程，自問要關心周圍事物，況且不時有大銀行、大公司贊助一啲學生以及行政人員到UW上訓練班，課餘要安排市內市郊旅遊節目，我去得多，自然識晒。如果香港朋友到西雅圖旅行，我可以提供一日遊，兩日遊，三日遊嘅行程㖭！」教授Ｌ話時間無多，飲完早茶立即車我哋去PublicMarket行一趟，呢個係濕貨及蔬果街市，對香港人嚟講，冇乜特別，但因為在市中心（downtown）海旁，由Fairmont、四季、喜來登等大酒店步行可至，特別吸引外來遊客，呢條街上有一處名勝，就係1971年創業嘅Starbucks老店，不少日本遊客入內掃貨，購物在間間星巴克一樣嘅啫，有乜特別？就係附送一張貼紙，寫住1971星巴克第一店，星巴克在全美國削減分店數目，呢間最老嘅小店一定唔會關門。
跟住教授Ｌ帶我哋遊車河，在市區中心環繞一周，指點那處是必須一遊之博物館、公共圖書館及某大廈三十幾樓嘅星巴克，喺嗰度飲咖啡可以環覽全城。可惜我哋時間不多，來去匆匆，惟有期諸下次，至於係幾時，真係唔敢講。左丁山第一次到西雅圖已是做賓架時期，到UW上課受訓，住過三個禮拜，當年同學之中，還有一位做緊銀行，就係董事長賓架Ｆ。當年西雅圖樣貌，已不復記憶，只係記得「太空針」（SpaceNeedle），下次幾時再到西雅圖呢？隨緣啦。
中午時份，開始下雨，越落越大，西雅圖悶人之處就係幾乎日日落雨，老總Ｓ話此城之天氣預測最多嗰句就係：「今日天晴，晴時有雨」。西雅圖可以講得係天無三日晴，喜歡熱鬧之人，會怕到西雅圖長居！