特區政府成日話要發展創意工業，但啲政要高官全部零創意，點搞呀？好似鄭耀棠咁，身為行政會議成員，近日出親嚟回應公投運動就淨係識話口號激進市民唔受，真係悶過回南天，噚日又嚟料，八方聽到連打三個呵欠。不如上網睇吓啲內地網民點睇香港公投運動好過。
自從國務院港澳辦歷史性罕有地出稿喪鬧公投違法，內地網民相當關注香港公投運動嘅動向，一啲大陸討論區都有唔少網民留言，雖然大部份緊跟中央主旋律，但竟然有撐公投聲音成功漏網。
好似內地搜尋網站一哥百度嘅「百度知道」，就有好多有關香港公投嘅知識，有網民問「香港公投會成功嗎？」最佳答案非常有力：「公投違法（反）了國法，國法違法（反）了天道，所以，公投順應了天道。大勢所趨，人心所向。你可以愚弄人民於一時，你可以愚弄少數人於一世，但是你不能愚弄大多數人於一世，人民的眼睛是雪亮的，民主的力量是巨大的，世界大勢，浩浩蕩蕩，順之者昌，逆之者亡。」
計落鄧小平都違法
「甚麼是香港五區公投?」嘅最佳答案亦相當中肯：「……在補選中，泛民以單一普選議題作為選舉口號，讓市民投票，該議題就可被視作為變相公投，假如泛民總票數過半，即代表提出的普選議題有相當的民意基礎，藉此行動，希望對特區政府和中央政府造成政治壓力，並在國際間引起廣泛的關注……」
日前有網民則喺內地環球網論壇轉貼一篇題為《香港公投，何錯之有》嘅文，仲括住「好奇心驅使我想在環球試一試，看此文能否被放行——（估計很難）」，果然冇幾耐篇文已經被刪，但用百度快照依然睇到存檔。
篇文主要反駁港澳辦嘅公投違法論，話中國憲法或香港基本法無禁止公投，香港人同大陸人都有權公投，港澳辦嘅言論先冇法律依據。文章作者仲講到30年前開始實施分田到戶嘅生產責任制之時，中國憲法仲係規定實行人民公社制，分田到戶完成後修憲係後話，話若果嗰時唔係鄧小平等領導人大膽違憲違法，中國就冇今日。
mailto:[email protected]