網上有人勁彈！蘋果公佈嘅iPad，話佢似電腦？但唔支援Mac軟件，話佢似肥仔版iPhone？又無電話分唇，簡直鬼五馬六！好多人認為佢係電子書KindleDX對手，面對全球最勁嘅超級書蟲Amazon，iPad又能否學iPhone咁，極速上位成為用家至愛！
記者：陳國輝
攝影：陳盛臣
Model：Sandy@PureModels
紙質屏幕Kindle勝
佢掂唔掂？最簡單又最重要嘅方法，應該由閱讀者習慣開始！KindleDX最獨特之處，係支援E-Ink芒，佢同一般屏幕最大分別，就係放棄BackLight，畫面上嘅文字全靠環境光線照射，先顯示到，感覺十足一張紙，適合長時間睇；至於iPad就沿用高質素嘅LED芒，唔係話彩芒會好傷眼，不過長時間睇絕對有影響，亦容易令眼睛好快攰，根本唔適合取代書紙。從閱讀角度想，當然越接近真實嘅書紙，就越容易接受啦！
直覺揭頁iPad最型
模仿一本書嘅感覺，除咗單靠視覺，手感亦相當重要！iPad將iPhone嘅直覺操作融入電子書功能，例如揭頁嗰陣，閱讀者需要用手指逐頁逐頁咁翻，加埋支援多種字款，肯定無咁悶；相反，Kindle除咗支援橫向檢示之外，竟然不設輕觸式屏幕，翻頁，揀選其他功能時，全部依賴機身側邊嘅分唇鍵，好唔夠User-Friendly！
藏書量方面，KindleStore已經有40萬本之多！雖然iPad未公佈實際數字，但有傳聞話佢已經同美國幾間主要出版商簽定合約，加上可經AppStore直接下載，相信數量會增加得好快。
未有中文系統失敗！
就算分唇勁到識飛，可惜暫時仲未提供到中文版電子書，我哋大中華地區只係睇得用唔到，諗起都幾無癮！以KindleStore為例，現時佢提供嘅全部係英文電子書，上到Amazon網站，依舊得網上訂購服務；iPad同樣無中文介面及輸入，至於購書平台iBookStore，暫時只為美國用家服務，究竟大中華地區，香港幾時先用到？可能要慢慢等喇！
同場加映 另類電子書
1cm膠料特薄
PlasticLogicQUEproReader，同樣使用KindleDX的E-Ink技術，但厚度不足1cm，觸感似紙！被稱為未來報紙及雜誌嘅閱讀工具。
讀寫無障礙
SamsungE6及E101最獨特係配備輕觸式屏幕，並有手寫功能，同時屏幕下也有獨立鍵盤，畀用家可以一邊睇書，一邊做筆記，功能最為完整。
我愛中文書
當全球兩大電子書仲未有中文書庫之時，台灣BenQ公佈將推出nReaderK60，玩法同功能都有啲似Kindle，最大賣點係支援中英日三語，更聲稱提供過百萬冊書籍。
