2010年政界第一場喜事，要數公民黨「明日之星」曾國豐迎娶公民黨前義工Doris。Doris細阿豐11年，有人擔心一對新人有代溝，有人就覺得阿豐好識揀，直認過往女朋友極多嘅阿豐覺得今次戀愛起義結婚無錯，Doris嘅80後火燄明顯已將佢征服。
長毛唱歌晒普通話
公民黨娶新抱，高層如阿豐直屬師傅湯家驊、袋巾同陳淑莊都有到賀，社民連同民主黨則分別派出長毛同卿姐做代表。歌喉麻麻嘅阿豐喺師傅Ronny傍住下，總算唱到哥哥首經典冧歌《為你鍾情》，令新娘子喜出望外。舞池上長毛亦迷死人，好多靚女爭住合照，佢嘅一曲《月亮代表我的心》，更令人嘩然，因為佢嘅普通話水平居然好過煲呔同唐唐。
新郎新娘以外最矚目一對，可算陳淑莊同佢另一半英雄哥，只見佢哋喺舞池中合照都合拍過人，羨煞旁人。接唔到花球嘅Tanya話已經做過四次伴娘，言外之意唔通係下次想做女主角？英雄哥收到啦。