終審法院常任法官包致金姪女兜巴星交通警件事，唔少網民質疑被摑警員喺被摑一秒後，即露出痛苦表情兼且慢慢踎低，批評呢位師兄反應似乎過大，好戲得滯。
唔希望被斷章取義
警隊「一哥」鄧竟成噚日喺電台節目上庇護下屬，話部份網民可能側咗一面睇件事，作為管理層佢會由唔同角度去睇。佢話，班夥計為咗保護市民安全，每日都要面對危機，「每日喺馬路上都要辛苦工作，由好天氣以至好差天氣，又喺咁差嘅空氣質素環境下辛辛苦苦工作，遇到咁嘅事我感到遺憾。」希望市民尊重執法人員。
提到「知己知彼，百戰百勝」言論，「特警成」否認咁講係當示威者係敵人，佢話唔希望被人斷章取義。佢話有唔少年輕人參加示威活動，但部份年輕人可能唔太明白法例要求，又未必諗到對其他人嘅影響，警方希望透過溝通，令示威者明白情況。
有聽眾批評1.16高鐵示威當日，警員將部攝錄機隊埋示威者面部，係挑釁行為，特警成就回應，可能嗰時發生突發事件，有關夥計需要記錄，並非針對個別人士。佢仲話收到來自不同階層嘅讚賞信，表揚警方處理手法。