酒吧睇3D英超，注定失敗收場。
今晚英超大戰，本來紅魔鬼對陣兵工廠已經火氣十足，英國天空電視台還是要火上加油，來個立體睇波搞搞新意思，今晚先在當地找十間八間酒吧作試點，做做氣氛，本來有創意確實惹人鍾意，但考慮到時間性上，早前ESPN才公佈6月世界盃會搞3D直播，這邊廂天空電台可能是心有不甘，所以提早搶閘，旨在攞威。
揀酒吧首播大錯特錯
3D是大潮流本來勢不可當，但今鋪揀在酒吧首播就肯定大錯特錯，皆因那個礙事的立體眼鏡，本身就與酒吧格格不入，先講眼鏡之礙事，有看過《阿凡達》的可能都試過途中脫下眼鏡，結果看見的是令人暈眩的紅藍畫面，即是說立體效果，非戴眼鏡坐定定不可，偏偏去酒吧睇波的，有那個是正襟危坐的？酒吧睇波就是夾雜着吹水、隊啤、猜拳及撩女仔等大動作活動，要戴着副厚眼鏡限制活動範圍，酒吧中的痴男怨女有幾多個肯制？再加上酒吧好、茶餐廳又好，電視要開睇波，就是為了吸引那一班咁橋行過的過路人，比賽刺激就話駐足觀看然後坐低飲番杯啫，若果行過只見紅藍鬆郁濛畫面，就自然立即過主啦，豈不即是趕客？
真的要試行3D睇波，最佳地點始終非戲院莫屬，只不過一年一度大電影就話啫，每星期要畀多餘錢入戲院睇波的話，亦只是開玩笑，要立體睇波成事，一定要解決不用戴眼鏡，否則只是小眾玩意。
波好睇與3D無關
3D說來說去，是發行商買得大賠得大的玩意，博你觀眾肯畀多一個幾毫，但說到底，波好睇與否，與立體毫無關係，朗尼無表現的話，戴立體眼鏡也不會看到他曉飛。
我其實是愛3D睇波的，還要是4D的，就是去現場睇嘞。
文：馬啟仁
電郵：mailto:[email protected]