坦白講，睇完荷李活科幻片《阿凡達》（Avatar），要扮片中強悍的外星土著Na'vi戰士，香港堪輿界中除卻蘇民峰別無他選，難得今年50歲的蘇民峰童心未泯陪我們玩，樂意各位讀者開心。塗上一身藍色油彩的阿凡峰，形神俱似，以為熱愛遊世界的他會夢想漫遊潘朵拉星，再趁機識番個土著女友，誰知阿凡峰心中只惦念峰嫂，拍完照急急腳赴約撐枱腳。
撰文：比華利
荷李活電影《阿凡達》熱潮席捲世界各地，蘇民峰crossover《阿凡達》的外星人Na'vi土著，豈只天下無敵，簡直笑爆全城。肖鼠年屆半百的蘇民峰，日前爽快應允扮「阿凡峰」贈興，拍攝當日他準時現身，甫進影樓即埋位上妝，效率十足。他表示本想先看過電影，惜礙於未有時間買票進場，故全權將變身責任交託化妝師，其間表現得非常合作，有求必應。
喜以爛gag搞氣氛
在鏡前坐足兩粒鐘上妝，蘇民峰依然腰板挺直，還不時講爛gag搞氣氛，先自嘲變化石，當化妝師將油彩掃上身時，他又說：「感覺凍冰冰。」為配合造型紮辮時，擁招牌M字額的他不避忌地說：「我冇人哋（阿凡達）咁多頭髮，使唔使加番執。」現場一致通過讓蘇民峰保留其招牌額，他又順攤附和。完成化妝後，問蘇民峰可滿意造型時，他順得人地說：「我對出嚟效果冇意見，最緊要大家鍾意。」
逾20萬金勞冧女友
過往曾反串梁詠琪，扮過哈里波特，甚至近日應景扮埋老虎，到底哪個造型最啱心水？蘇民峰說：「我最鍾意扮番蘇民峰，唔化妝就唔使煩。」話雖如此，阿凡峰上身的他在鏡頭前後生鬼到你唔信，一時拉弓射箭，一時凌空踢腳，甚至耍埋詠春和泰拳，身手敏捷。扮嘢過足癮後，他表示仍要入場睇戲，皆因女友之命不能違。
農曆大年初一正值情人節，問蘇民峰會給女友甚麼驚喜？他把口甜到漏地說：「冇喎，我情人節、復活節同聖誕節都唔會送禮物畀女朋友，一星期又蒲三晚，我哋真係日日都做節，日日都生日，我覺得要慶祝嘅人，因為平時唔開心啫，我哋日日都咁開心，又使乜嘢過節先嚟慶祝。」
問到蘇民峰除了送上一顆真心給女友，過去曾送過甚麼特別禮物時，他說：「女朋友見到王菲戴金勞，佢又話好想要，我哋舊年去瑞士旅行，我咪買咗隻20幾萬嘅畀佢，佢寧要Mansize唔要Boysize，女仔手好幼，金勞差唔多兩磅重，所以佢每次戴都扭親手，仲要睇跌打，??家都戴唔到，惟有放喺保險箱用嚟欣賞。」
「我正職係投資生財」
蘇民峰又爆女友早前要求買平治吉普車，新鮮感過後已將座駕打入冷宮，不過他仍維護女友說：「佢其實好慳家，平時買衫最孤寒，佢貴過1萬就唔捨得買，佢又唔會亂使錢。」蘇民峰與女友拍拖近20年，為何仍不給女友名份，他抵死地說：「名唔名份唔緊要，佢最緊要銀行戶口攞到錢啫。」
身為堪輿師，難免忍不住手為自己推算運程，蘇民峰也不例外，他說：「我一早推算到自己25歲到45歲會行大運，45歲到55歲就平平穩穩，55歲到85歲仲會有30年好運，早年我算到自己05年會減產，04年工作量太大，我搞到身體都差晒，之後我悟出今後日子要好好享受人生，決定做師傅係副業，正職係投資生財。」
蘇民峰享受人生的方法，就是一年最少旅行10次，每次必定豪玩、豪食和豪買，他豪氣地表示全年旅費高達200萬，這筆錢足夠買到一個小單位，蘇民峰說：「我去旅行一定要豪，我最鍾意去米蘭同東京買新裝，如果嗰年要做電視節目，好多鏡要出，嗰年就買多啲新衫，我唔係天生購物狂，只係為工作啫。」
暗寸演禽術信唔過
識使錢當然也要識搵錢，蘇民峰自言財來自有方，對於同行李丞責自誇曾多次運用術數「演禽術」貼中3T，多年前更中了300萬彩金，卻因財失義兄弟反目，蘇民峰坦言自己並不擅長，他說：「如果有，我都日日貼，使乜仲睇風水，不過人哋識幾多我唔知，我就唔識啦，我係用腦嘅人，亦信天機，從來唔信無稽嘅嘢，我都從來唔賭馬。」蘇民峰不但信天，也感激上天所賜，他衷心地說：「個天算對我唔錯。」說完隨即哈哈大笑，知足常樂或者正是這個意思。
發達之路買舖收租養老
虎年將至，人人都想新一年財星高照，銀行戶口數字多幾個位，已躋身億萬富豪行列的蘇民峰，自有一套生財之道，除了擅用玄學掌握投資天機，還要配合獨到眼光和膽量。
睇好中國基金
蘇民峰說：「作為打工仔，單係打份工一定儲唔到錢退休，我建議後生仔開始打工，儲到錢就要學投資，我都係咁買吓股票同地產，家喺尖沙嘴同中環擁有10間舖，夾夾埋埋總值幾億，單係用租金都夠養老。」蘇民峰愛買舖多過買樓，他說：「因為旺舖唔愁租唔出去。」
不過年輕人想投資，未必夠資金付首期，蘇民峰說：「咁可以先買股票，大家怕風險，我建議佢哋買A50中國基金同盈富基金，一定唔會變廢紙，就算買滙豐同恒生都好安全，我只嫌恒生升得較慢。信我好過信專家，教人投資嘅人仲窮過你。」
虎年娛圈大預言
風水預言，信不信由你。繼麥玲玲、司徒法正和楊天命之後，蘇民峰也作出虎年10大預言，提醒藝人趨吉避凶。
1.徐子淇屬火，虎年易有BB，但今年若懷孕，生仔成數較微，她在2012年生男丁機會較大。
2.梁洛施雖跟李澤楷拍了婚紗照，但虎年仍未有機會嫁入豪門，其實她由16歲到26歲都行少年運，這段期間有幫夫運，可是現在情況看來，她的男友根本不需要她輔助，入宮機會不樂觀，但26歲後不知可會有轉機。
3.劉德華去年犯太歲，反而適合生仔和結婚，至於虎年農曆3月時有利造人成功。
4.虎年較旺秋冬出世的藝人，肖牛、羊和兔的藝人，如果是秋冬出生會加倍行運。
5.除了肖虎藝人冲太歲，肖馬藝人則有官非星，容易招惹事端，特別虎年會有不少麻煩事，宜一喜擋三災。肖猴容易撞車，最忌醉酒駕駛，飲酒切記要做乘客。
6.電影業方面，不論武打片或喜劇的題材上，虎年都大利一些有謀略內容的電影，最好要有深層的故事內容。
7.虎年娛樂圈有不少女藝人生BB，上半年較多女嬰出世，下半年則轉為多生男嬰。
8.每20年都會有大災劫，虎年西南位和東北位分別會有大小災難發生，藝人若到四川、西藏、印度、印尼、東非、北海道和韓國工作要額外留神。
9.崔建邦去年冲太歲，所以情緒受影響，並發生涉嫌打女事件，短期內難翻身，其實他本來正值行26歲到31歲的大運，但發生事件打斷自己好運，最快要到2012年先會轉好。
10.今年尾數是雙數年，玄學推論股巿先跌後升，藝人或市民都可看準時機入巿投資，西面有20年地運，仍是理想置業之選。
變身Na'vi逐格睇
拍照當日穿着一身貴價名牌時裝到場的蘇民峰，經專業化妝師Kathy妙筆生輝後，變身阿凡峰令人眼前一亮，Kathy說：「化呢類特技妝比較複雜，最重要掌握到當中角色神髓。」近兩小時定裝過程中，每個細節都絲毫不苟，想偷師學蘇民峰變身，唔好等啦，立即逐格睇。
化妝、髮型：KathyL.（CiaoBella）
後記
佳人請原諒！
蘇民峰每分每秒都可以賺錢，預約他看相最少排期半年，插隊甚艱難，難得他答應變身「阿凡峰」，明知化妝需時，特意安排休息日拍照。最初蘇民峰只答應騰出兩小時，甫抵影樓更已聲明拍攝後要趕會佳人撐枱腳，可惜事與願違，最終延遲了個多小時才竣工，但蘇民峰EQ極高，全程耐心又投入，坐足兩小時定妝也毫無怨言，任由化妝師搓圓㩒扁之餘，還風趣贈各人幾句，專業精神猶勝不少自誇專業的藝人。蘇民峰的女朋友，他當日遲到真的不是他的錯！