震雄集團（057）淨現金上7億銀，防風力強，先睇位兜一轉。震雄上年9月底，揸住現金7.9億銀，銀行債務得3740萬銀，淨現金講緊7.5億銀，工業股當中，震雄現金底厚。
震雄2010年半年度（9月底止），純利倒退60%到4600萬銀，受上半年度業績拖累，相信全年度埋單計數，PE都會喺雙位數。但要咁睇，震雄係全球最大注塑機生產商之一，睇埋再對上四、五個財政年度，震雄年純利係講緊2.5億至3億銀樓上，即係PE5、6倍水位。相信隨住阿爺谷內需政策支持，連埋海外市場走出經濟陰霾，震雄中線業績可以逐步回穩，上番07、08年度純利水位，一啲唔出奇，值得長線跟進。呢轉先小試牛刀，震雄股價再跌，吼實2.25元兜轉，博集團上番0.8倍PB3蚊水位，講緊要升33%。
寰宇燒冷灶博升2成
寰宇國際（1046）最新NAV0.18元，折讓挨近50%，係折讓最大嘅電影媒體股之一。又寰宇最新揸住淨現金1億銀，又係現金牛一族，PB及財政過關。呢期所見，阿爺發佈對祖國電影業基礎設施意見及支持，寰宇會唔會北上，冇人知，但電影基礎建設增加，亦對寰宇呢類製作及發行商有利，寰宇都有point炒。冷灶一吼，博升20%到0.108元，寰宇未有耐上到NAV。
錢雋