雖然仲有成兩個禮拜先至過年，但自由黨方國珊日前率先同地區友好搞團年飯，前主席田北俊同前副主席周梁淑怡都有畀面出席。自由黨搶先宣佈放棄參加五區補選，好多人覺得可惜，事關佢哋都好想投票畀田大少，等佢循新界東捲土重入立法會。不過事到如今可惜都冇用，自由黨重申佢哋未放棄新界東，反而會大力死守，主席劉健儀今年嘅揮春巡遊活動，就揀咗喺將軍澳厚德邨啟動，象徵意味極濃。
棄選新界西嘅田二少，雖然覺得無奈但都覺得決定冇錯。田北辰話個黨首要目標係組織年輕人參加2011年區議會選舉，為2012年立法會直選鋪路。副主席張宇人話好多謝譚惠珠澄清自由黨唔係建制派，因此玩離場而流會呢筆賬，千祈唔好算入佢哋度。