公投五俠告別議會，隨即結束立法會議員辦事處搬竇，社民連三子總辭，租用長沙灣6,000方呎工廈做總部，月租幾萬蚊，由於係30幾年舊樓，業主打算年底重建，所以願意租畀社民連。
長毛嘅將軍澳辦事處位於慧安商場，據講業主幾有人情味，話如果冇其他人租用，會預留舖位畀長毛，等佢重返議會後再續前約。毓民位於石硤尾邨議辦人去樓空，據知建制派虎視眈眈呢個地盤，鼠王芬之前都睇中同一單位，可惜抽籤落空，家陣騰空咗，佢又有機會插旗。
公民黨梁家傑幾個地區辦事處都火速起錨，暫遷觀塘工廈落腳，佢喺樂富邨辦事處會由黨友吳靄儀接手，係吳大狀第一個地區辦事處，另一個位於藍田啟田邨辦事處則交回房署。有人指工聯會議員可能有興趣入邨，鋪路日後出選咁話。