在美加邊境留咗兩個鐘頭先至入到美國境，到下午近四時先至可以開車。巴士將到西雅圖之際，公路上滿是汽車，只能慢駛，入到城內之TheFairmontOlympic酒店，已是晚上六時，天下毛毛雨，街道暗黑，行人稀少，擒擒青青上房放低行李之後，又要落樓，上巴士去吃晚飯，想落上一次進食時間已是在飛機上嘅早上八時許，唔肚餓有鬼。
一早安排好，在LakeUnion旁邊一間餐廳Canlis訂好私人房，入內有火爐，室外冬寒，室內溫暖如春，望出去係「無敵湖景」，相信中午在此吃飯，景色更美。左丁山本來對蝦蟹敏感，但事先知道在西雅圖如果唔吃海鮮，仲有乜好吃，唔通人哋吃鮮蠔，自己食漢堡包乎？於是一早到藥房買定敏感丸，吃完蝦蟹之後，睡前吞一粒，幸保無事。
果然，呢間Canlis係海鮮餐廳，頭盤就係生蠔青口及蝦，鮮美無比，人人讚好，怪不得成間餐廳坐滿人，據講晚晚如此。各位如到西雅圖，不妨預早訂位，呢度啲海鮮，香港無一間西餐廳可以媲美！
美食當前，雖經十八小時旅途，精神為之一振，食得開心，但一返到酒店，稍為放鬆一下，梳洗完畢已難敵睡魔侵襲，立即上床，不省人事。直至電話響起，拎起床頭電話一聽，教授Ｌ話：「我哋已在lobby等你！」嘩，為之彈起，原來已是星期日早上七時四十五分，如果教授Ｌ唔打電話嚟，瞓到日上三竿都似。匆匆換衫落到樓下，教授Ｌ話一場來到，在酒店吃美式早餐就太普通咯，不如去唐人街飲早茶。又好啫，去到間「翠苑酒家」，其貌不揚，裝修普通，典型唐人街酒家格局，我哋八點半殺到，得我哋一枱四人，霸番張靚枱先，九時過後，成條唐人街仍然冇乜人，有人嘅就係呢間酒家，全院滿座，客人有廣東人，日本人，但以美國人最多。教授Ｌ云：「淨係睇吓門口有美國人排隊等位就知呢間香港人開嘅酒家馳名西雅圖！」吃碗象拔蚌白粥，便知非凡，其他點心就一般，香港二流頂水準啦。