好多香港人鍾意去新界郊區一日遊，但斷估唔會諗住去郊區請願當節目。前日地政總署人員喺上水河上鄉清拆兩間非法寮屋，河上鄉鄉事委員會竟然動員幾百個婆婆到場，美其名話包膳食玩番日，實際上要佢哋做「人質」，阻止清拆行為。
新界王嘅鄉議局主席劉皇發今次唔幫自己人，噚日佢出席張學明嘅屯門辦事處開幕時，開口「訓示」唔聽話嘅鄉紳，形容動員阿婆去示威嘅行動「有啲問題」，唔係咁好，仲希望其他一眾新界人要理性啲、唔好搞啲激進行為。發叔今次放重話有原因，事關鄉議局都一直勸菜園村村民理性爭取，冇理由呢頭叫人和平，佢哋自又有人搞事，如果啲鄉紳唔想發叔咁頭痕，怕且都要聽話，唔好整古作怪。