【本報訊】「如果唔係Elmo，我同女友都可能葬身冧樓廢墟。」土瓜灣馬頭圍道恐怖塌樓造成四死兩傷慘劇，冧樓前的一刻，災場四樓上演一幕靈犬哀鳴勇救兩位主人的感人故事。與女友僥倖逃過一劫的陳先生，昨日抱着3歲大狗女Elmo講述逃命經過，心有餘悸。他說當時與女友及愛犬，以30秒從四樓逃離瞬間夷為平地的災場。 記者：李偉民
勇救兩位主人的狗女，名叫Elmo。據住在倒塌樓宇四樓狗主陳先生表示，Elmo平時很聽話且十分「黐身」，在家裏幾乎是形影不離。「前日下午1點，Elmo突然不斷『嗯、嗯、嗯』咁叫，仲間中吠叫，行為同平時好唔同。」陳先生表示，當時他正打機沒有理會，Elmo隨即衝入房向正在酣睡中的女主人「旺旺」吠叫。
「如果有人瞓覺，Elmo從來唔會嘈嘅。」陳先生覺得奇怪，於是入房查看，當時發現Elmo目露驚恐，望着牆壁及天花。此時，陳先生才見到牆身及天花出現一條長長的裂痕，並有批盪不斷掉下。
裝修工拒上樓：好危險
陳先生即致電業主講述情況，並要求業主着裝修工人前來查看，但業主只給他一個裝修工人的電話號碼，陳先生致電該號碼卻無人接聽，惟有跑到樓下地舖找裝修工人。由於找不到工人，陳先生只好再跑回四樓家中，這時見到原來那條裂痕已擴大，闊度可塞入一隻手指。
「我再落樓搵裝修工人，呢個時候見到兩個咬住牙籤啱啱食完飯嘅工人喺樓下。」陳向兩工人表示樓上天花及牆壁出現裂縫，並要求兩人上樓查看，但兩工人耍手擰頭說：「好危險，唔上喇。」似乎預知有危險。
30秒「四樓跑到落樓下」
陳續說：「當時我企喺中國銀行側邊，見到棟樓外牆有磚頭冧緊落嚟！」他即時一口氣跑上四樓，帶着女友與愛犬衝落樓，當他們就快跑到對面馬路時，背後即傳來「轟、轟」聲，隨即捲起大團煙塵。
「好彩，我只能講一聲好彩，呢次多得Elmo，如果唔係佢不停地咁嘈，我可能唔理佢繼續打機，咁我可能俾人掘出嚟喇，抵我咁錫佢。」陳先生溫柔地拍着Elmo說：「由四樓跑到落樓下，我估至多30秒，遲多幾秒就慘喇！」
在赤鱲角機場從事空運工作的陳先生透露，他與女友五年前租住現場四樓一個180呎一房一廳單位，月租2,300元。
至於是次塌樓造成的損失，他說：「執番條命就好好彩，如果一定要講損失，就喺屋企有幾部電腦，其中一部仲係啱啱買嘅。」
犬隻感官比人類靈敏
對於靈犬救主的行為，香港職業犬隻訓練員協會會長劉錦豪指出，犬隻的感官比人類靈敏很多倍，當四周環境出現不尋常變化，犬隻會發出警報，通知同類或主人作出防備或逃走。
他解釋，犬隻在塌樓前已聽到牆身裂開的聲音，感覺到樓宇有不正常的震盪，更可能已嗅到牆身裂開後發出的氣味。犬隻若發現四周可能存在危險時，會作出不尋常的動作，例如狂吠、哀鳴，甚至用爪去抓主人等。
靈犬救兩主人示意圖
