土瓜灣恐怖塌樓，災場方圓一帶愁雲慘霧，諸事不宜高調，噚日喺距離災場一個街口，舉行首次立法會議員辦事處開幕嘅民主黨涂謹申，亦要即時作出緊急應變措施。佢雖然請到發展局局長林鄭月娥、保安局局長李少光主禮，但堅持一切從簡，除咗切燒豬要借歪，局長亦唔使發言，再喺儀式開始前為死難者默哀一分鐘。
阿涂講番塌樓事件，先知佢噚日開張嘅新辦事處，原本喺正塌樓隔籬嘅大廈閣樓單位，後來由於助手嫌租貴，加埋擔心閣樓有僭建，最終冇租用，否則佢可能已經淪為石屎下嘅亡魂。
新婚老婆做跟得夫人
話就咁話，不過避過一劫嘅阿涂噚日入伙嘅地舖單位，原來都有成53年樓齡，問阿涂驚唔驚冧樓，佢有啲勉強苦笑咁話「都唔驚嘅」，指自己身為九龍西議員，當然要喺當區為居民服務，加上91年起，佢已喺上海街嘅舊樓服務街坊，所以都算見慣風浪，「我諗安全啩，冇特別留意係咪安全，只知道政府冇發出維修令，睇嚟都安全嘅」。政府唔知信唔信得過，阿涂好識擦鞋咁話為咗服務街坊，預咗「死而後已」。
阿涂新婚老婆阿Sue噚日做跟得夫人，話仲適應緊俾人稱呼做涂太。問佢擔唔擔心老公工作要不時立於危樓之下，涂太就甜笑話：「唔驚，佢福大命大嘅！」
救咗阿涂一命嘅助理話，當日諗住幫老闆租喺正冧樓隔籬大廈嘅閣樓單位，主要係貪個單位喺正大馬路夠方便，但由於要成9,000元一個月，比家單位貴1,000元，所以放棄。事後諗番轉頭，如果唔係為慳錢，「呢劫好可能避唔過」。民主黨副主席劉慧卿噚日都有去撐場，乘機批評政府，慨嘆自己個辦事處一開始連廁所都冇，「你睇我哋啲議員辦事處，同政府差幾遠？」
mailto:[email protected]
