兒子出世前已經開始索K的王建華，8年來經常索K「揸車」，在公路飛馳，險象環生，「俾差人追嘅時候會覺得刺激，會諗，你追到我先算啦！」他說以往警員不太掌握索K揸車的情況，「追到我就停囉，但係差人當我揸快車，唔知我索咗K。」
王建華試過索K後在東區走廊左穿右插，跟前面私家車碰撞，差一點就在筲箕灣把一個路人撞倒，為甚麼索K後仍要揸車？「吸毒嘅人只會諗自己，唔會理人，覺得K唔可以唔索，車又唔可以唔揸。」索K後會變得很大膽，但頭腦不清晰，揸車橫衝直撞，好危險，「家諗，咁多年都冇出事，係好好彩，我好感恩。」他以過來人忠告這類犯事者：「你可以唔愛惜自己條命，但唔可以唔理人。」
4、5年前，王建華深宵索K後準備去蒲，在西營盤正街失控，整輛車擺停在電車路上長達兩個小時，「差人大力拍我車門，問我有冇事，我話唔舒服，佢哋就冇理我。」他挨在椅背上，腦袋有好多超現實的幻覺：「睇住軚盤，點解會發光嘅？」
差點撞倒路人
有索K經驗的新生協會事工幹事錢龍玉說，「通常一索就到頂，人會向前伏喺軚盤上，一踏腳掣，車就會停。」但肌肉失控一刻很易出事，對路面行人及車輛都會非常危險。
本報記者