辭職五俠噚日正式失去尊貴議員身份，長毛前日臨別一擊送狗骨玩殘譚耀宗，公民黨陳淑莊同梁家傑就含淚送曲奇餅，毓民同陳偉業人前表現瀟灑，其實內心深處都係放唔低，前晚11點幾鐘，即係離落任半小時前，兩人靜雞雞返回立法會。
兩人早就聲言唔會收回辭職信，夜麻麻忽然返回立法會，唔通想憑弔做尊貴議員嘅光輝日子？辭職冇得返轉頭，兩人重回舊地，原來係因為陳偉業泊咗架車在立法會停車場，為免被指唔係議員佔用公家資源，濫用立法會停車場，所以趕返去揸走架車。中環車位矜貴，因此好多議員離任時，最唔捨得嘅往往係呢個位置就腳兼保安一流嘅停車場。