家計會在70年代以「兩個夠晒數」做宣傳標語，流行至今，80後的江若琳更把口號變為養狗論。愛心爆棚的她擁有兩頭愛犬，當時在母親反對聲下先斬後奏買回家，現在愛犬不但是江家開心果，更是江若琳暫忘緋聞的靈丹妙藥。 撰文：比華利
愛狗如命的江若琳，飼養了北京狗旺旺和松鼠狗冬冬，疼錫牠們的程度更超越胞弟，兩狗又甚為乖巧，極討江媽媽歡心，牠們為家中帶來不少生氣和歡笑。江若琳在8年前與爸爸在旺角的寵物店買旺旺回家，她日前說：「嗰時我仲未入行，因為一直都鍾意狗狗，嗰日我行經寵物店，見到旺旺好啱眼緣，明知媽咪最憎狗，但點都爸爸買咗佢，我哋兩父女實行先斬後奏。」
媽媽呷乖女醋
當江若琳父女歡天喜地帶新成員旺旺回家，不出所料令江媽媽大動肝火，但翌日江媽媽看見可愛的旺旺，態度立即軟化，江若琳說：「不過媽咪先旨聲明，講明我唔可以再養，因為要照顧一隻狗都好花時間同愛心，佢話我再買佢就心臟病。」
偏偏江若琳前年與寰宇老闆林小明傳緋聞，心情大受影響，其間她就忘記了母親的訓誨，衝動下再買了冬冬回家，她說：「嗰刻我想借照顧新狗冬冬嘅動力，分散自己嘅注意力，唔畀自己再胡思亂想。我再次冇知會媽咪就抱咗冬冬返屋企，媽咪見到梗係嬲爆，佢猛話我只識玩，最後執屎執尿又係佢。」其實江媽媽口硬心軟，最終對冬冬又係錫到燶。
江若琳並未有呷醋媽咪的偏心，反而江媽媽妒忌兩頭愛犬勁黐女兒，江若琳說：「我有時凌晨收工返屋企，旺旺同冬冬都立即扎醒出嚟大門歡迎我，佢哋對我好忠心。有時我喺屋企練歌，佢哋都會聽到瞓晒覺，好搞笑。有時我唔開心同佢哋傾偈，佢哋又會埋嚟嗲吓呵番我，佢哋係我最好嘅朋友。」
一剛一柔護主
兩頭狗狗更是江若琳的貼身守護神，性格cool爆的旺旺因自幼被縱壞，一旦發現有陌生人接近江若琳，牠都會發惡咬人，她說：「佢係我嘅貼身保鑣。」至於性格活潑的冬冬則是親善大使，牠對主人的朋友不時搖頭擺尾，份外親切。旺旺和冬冬正好互補不足，難怪江若琳強調不能再有異心：「不能多，也不能少，屋企有兩隻狗狗就啱啱夠晒數，佢哋仲係我嘅嫁妝。」
攝影：陳志嵐
化妝：YoYoTang（PicturesqueGate）
髮型：JamesLee（HAiR）
服裝：DianeVonFurstenberg
為食冬冬耍家碌地沙
江若琳的「細佬」冬冬是隻為食狗，看見零食份外雀躍，她每次訓練冬冬學習動作時，例必以零食作獎勵。冬冬除懂得向主人熱情遞手，強項是表演碌地沙，當江若琳示意牠趴下後，然後她一伸手指令，冬冬便會醒目地在地上不停滾動，全身奶白色的牠，圓碌碌的身形恍如一團毛球滾動起來，動作惹笑。
怕出事少出街
對於冬冬饞嘴，江若琳表示要吼到實，她說：「我平時好少帶佢落街，因為怕佢亂食街上嘅嘢，咁樣好容易會病，有次我見佢喺屋企食地下嘅髮夾，嚇到死死吓，自此之後，我哋屋企更加要保持一塵不染。」平日除狗糧之外，江若琳偶爾也會烚雞肉給愛犬吃，希望令牠們得到均衡營養。