社運新勢力80後、90後崛起，好多人指呢班o靚仔讀書唔成亂咁衝，散兵游勇不成氣候，實情佢哋唔係普通細路哥，講到政改問題，連政務司司長唐英年都叻唔過呢班細路哥。
被指應呼籲補選投票
唐公子噚日出席青協活動與青年對話，呢啲活動一般都十分河蟹，賓主盡歡收場，唐公子噚日一貫笑笑口到場，花唔少口水講政府會包容青少年意見，聽取80後、90後聲音，又呼籲大家盡公民責任登記做選民，明年同後年在區議會、立法會選舉中投票，偏偏絕口不提幾個月後嘅補選。
80後、90後不屑做河蟹，科大學生陳同學直斥唐公子浪費時間講廢話，尤其係高官開口埋口講包容，卻永遠做唔到包容民意，幾十萬人上街，政府只係深夜發個聲明了事，根本解決唔到深層次矛盾，佢更挑戰唐英年，「我好希望司長可以以身作則，呼籲全香港市民踴躍投票，喺補選度去表達意見，履行公民義務。」
呼籲市民補選投票，咪即係叫大家公投「起義」？想做下屆特首嘅唐公子梗係唔會咁講啦，講錯嘢隨時中箭落馬，真係要步步為營。身為政改「推銷員」嘅佢，反而承認好難解決政改問題，要推動普選更加唔容易。既然做唔好自己份工，八方唔知道唐公子有冇考慮辭職？
人大釋法拖延香港民主，喺內地大學讀法律嘅阿朗質問唐英年，人大常委中只有一個香港人范太，其他嘅都係內地人，包括少數民族代表，由呢班唔熟悉香港情況嘅人，掌握香港民主發展合唔合理呢？唐公子就話以全國13億人口計，特區700萬人已經有一個人大常委，唔係太少而係太多，甚至係「超額」，因為「同人口比例唔對等」，香港人要尊重主權國。
會後低頭急急腳走人
呢條數，八方相信唐公子點計都計唔掂，會上好多人質疑點解政府唔取消功能組別，唐公子幾乎無招架之力，會後記者問佢點解唔回應學生要求，呼籲市民喺補選時投票，唐公子無言以對，耷低頭急急腳走人。
mailto:[email protected]