還記得病重時的家英哥講過：「想同阿姐去睇櫻花」，如今迷人pinklady已成羅太，羅先生也健步如飛，二人也不要再等待，快去實現之前的承諾吧。想睇櫻花也不用等到4月，1月沖繩的初春，漫天粉紅的戀之風景正要綻放。噢，mylove，賣打令，多麼的浪漫。
記者、攝影：吳允冲
鳴謝：香港快運航空、SOLARE飯店度假村集團、沖繩觀光會議局
粉紅高峯
開花時間同開六合彩一樣，是天意，預定一月才開的沖繩櫻花，在和暖的12月便急不及待sayhi，但到了一月尾，怕凍的花兒們又鬧脾氣唔開，難怪日本氣象局心灰意冷，2010年開始不再推出櫻花情報。第一次睇櫻花的我，本來以為可以親眼見證小時候睇《日本風情畫》時，櫻花多到在風中飄揚的景象，但當我去到三大櫻祭之首的名護市中央公園時，只見還未開的花蕾，盛開的櫻花只得寥寥幾棵。沖繩的寒緋櫻，顏色比日本本島的櫻花深紅。沖繩本島上有3個花祭地點，以名護市中央公園景觀最全面，征服那幾百級的長命梯後，路旁櫻花雖未算燦爛，但現時已有一半開花，上得越高花開得越多，從山上俯瞰仲可以望到名護市的全景和海灣！好運的話，早上去還會遇到一班可愛的幼稚園學生，好cute啊，我哋一班人突然追鴨仔似的追住班細路狂影唔放！
a名護中央公園
地點：沖繩本島北部名護市
交通：從那霸空港站搭20號線巴士至名護城入口站下車，再行5分鐘
甜蜜花之大道
賞櫻的第二個熱點，是八重岳櫻之森公園。過了粉紅色的八重岳橋，可以沿斜路上山或落山。我選擇向山上行，沿路櫻花比名護中央公園的開得更燦爛，而且櫻花樹較矮，花也較多，仲可以成個人埋在花中扮花癡！在山上空地，可以一試homemade櫻花和蜜柑雪糕，還有農家擺賣沖繩的農產品，巨型白蘿蔔有成隻腳咁長，唔知點帶返屋企。冬天當造的沖繩蜜柑就可以即買即食，皮薄爆汁，味道甜過糖水，真係比藥水味的櫻花雪糕好食好多……如你手上只得300日圓，你知道點揀吧。
b八重岳櫻之森公園
地點：沖繩縣本島北部本部町
交通：那霸空港站搭20號線巴士至名護巴士總站，轉乘76號線巴士至八重岳入口下車，行約20分鐘
古城夜探
友人笑說，去clubbing黑麻麻時遇見的獵物總覺得好靚，一開燈便立即見光死！夜探櫻花也有此好處，枯枝一概淪為黑影。背景全黑，主角櫻花在射燈的烘托下，粉紅得特別鮮艷，沒有手震時拍下的照片，驟眼看都有幾分似蜷川實花的大作！這個十四世紀沖繩王國山北王的居城遺蹟，似是迷你長城，夜晚兩旁放滿蠟燭，加上又黃又綠的幻彩燈光，跟日照下的櫻花又是另一種風景。只怪我沒有帶上腳架同行，影相時只求風不要吹、樹不要搖、花不要動……紮行個馬，影100張相終於有3張無鬆郁矇！可以順利收工喇！
c今歸仁城迹
地點：沖繩北部今歸仁村
交通：那霸公車總站搭20號線巴士至名護公車總站，轉66線巴士到今泊站，行10分鐘
盡食島豬
沖繩各市的著名城內食店都趁櫻花祭聚首一堂，名護中央公園附近正舉行B級美食節，地道料理全部都以試食價300、400日圓發售，份量的骰。人氣排行榜第一位係黑漆漆的「山原豚肉葱飯」，香濃醬汁與豬內臟、豬腳等煮成一盆黑色膠質，食落滿口骨膠原，撒上葱花撈飯食，獲不少女士捧場；豚肉拉麪，男人食豬骨濃湯底，女人食清淡鹽味湯底，半碗份量 一聲就食晒。沖繩名物「島豬」的各個部位，都可在這裏食勻！單是鐵板燒串已有豬腩肉和背脊肉可揀，還有豬腳湯、炸豬腳等……還有以午餐肉夾半熟玉子和牛油果的餐肉蛋牛油果飯、蜜柑、紫芋、泡盛米酒雪糕……Keepfit？食埋今餐先算啦。
dB級GourmetFesta
地點：名護漁港內特設會場（名護市城3-1）
SakurainOkinawa
溫馨提示：今年沖繩的櫻花情報預測櫻花會開至2月15日，所以要睇就快點起程
TravelMemo
持BNO或特區護照可免簽證停留90日。查詢：25221184（日本領事館）
香港快運航空來回香港及沖繩，每位$3,380起。查詢： http://www.hongkongairlines.com（香港快運航空）
100日圓約兌8.67港元（文中價錢已折算港元）
100V，兩扁腳插座
日本沖繩
下周天晴15-21℃
