早輪喺立法會門外嘅反高鐵嘉年華，一班大埔師奶炮製嘅「高鐵滾蛋」茶葉蛋、「功能組別一嚿飯」飯糰，唔少人食過翻尋味，八方知道大埔師奶欲罷不能，過年前推出道德年糕、無剝削蘿蔔糕，諷刺保皇黨日前玩離場令立法會流會，令辭職議員冇機會發言，希望大家食過呢啲道德年糕、無剝削蘿蔔糕，唔好咁無恥。
全部用有機食材
八方打電話畀接柯打嘅友哥，佢話呢啲年糕係職工盟大埔培訓中心基層婦女組成嘅「星斗合作小組」以人手製作，每底糕都標明整糕者姓名，一般大路貨色冇得比，而且全部用有機食材做，保證食得健康。
友哥特別推介有機薑汁年糕，1,200克裝賣78蚊，用傳統黑原蔗糖做，加入錦田有機農夫昌哥嘅有機薑汁，古法蒸製，味道特別甘香；另一款有機炸油角每盒48蚊，用椰子油、麪粉自製酥皮，包住蔗糖、黑芝麻、花生，再用葵花籽油低溫慢炸。呢啲有機兼有心機賀年食品限量製造，售完即止，下月2日截止訂購，有興趣可致電26519833查詢。