鄭中基與蔡卓妍（阿Sa）拍拖早已半公開，但去年阿Sa單飛成績理想，不時傳出她為事業捨愛情。向來低調不談感情的鄭中基前晚出席方力申的畫廊開張，竟一反常態講戀情，坦言與阿Sa多靠電話及SMS維繫感情，年年都送情人節禮物給她。
方力申與父親開設的一畫廊前晚在中環舉行新店開幕儀式，鄭中基、雷頌德（Mark）、陳慧琳及許志安等都有到賀。方力申表示父親不在港，故由他負責招呼賓客。
「好少同佢出街」
蔡卓妍曾表示若有人拍到她與鄭中基拍拖的照片，願出價購下，鄭中基說：「好呀，問吓人哋收幾多囉。」問到二人出街是否特別小心？他說：「平時好少同佢出街，我近年拍戲成日唔喺香港，我哋好少喺香港見面，係通電話同SMS多。」過年會否一齊去旅行？他說：「今年唔得。」他謂今年情人節無法與阿Sa共度，至於送甚麼禮物？他說：「年年都有送o架啦！」
談到富商龐維仁將入股金牌大風，有傳黃柏高（Paco）會離巢，身為太子爺的鄭中基謂不清楚注資一事，要等公司宣佈，他說：「我唔係CEO，之前我都有見過Paco傾電影嘢，其實一年前公司有變動時都好多傳聞，我唔清楚就唔想講多錯多。」若Paco離開是否感可惜？鄭中基說：「當然可惜，佢做咗咁多年，但我冇聽過呢件事。」
小方斥資50萬找雷頌德任室內設計包裝修，談到龐維仁入股金牌大風，小方說：「有新資金投資係好事，希望公司開新戲畀我啦。」對於有指Paco離巢，小方說：「太多傳聞，等陳輝虹詳細講啦，Paco之前有嚟過，佢冇話會走喎，唔好講到佢真係走咁，會搞到我喊o架。」
Mark贊成注資金牌
Mark透露稍後會搬屋，談到龐維仁注資金牌，他認為是好事，並說：「有眼光嘅人先注資入嚟。」至於傳聞Paco離開，Mark則說：「應該唔會走，點解有人注資入嚟就要踢走咁能幹嘅人呢，上年公司多是非，家過晒，可以專心工作。」
採訪：王連連
攝影：黃文成