上月盟主
本月最後一次寫〈開倉〉頭條，下月怕且唔到我寫，當然要爭取最後機會霸地盤宣傳意甲。今次主題係「首都起義」，「起義」呢個名詞，政壇啲人點講唔關我事，我就簡單定義為一種想突破現狀嘅行為。意甲近年最不滿現狀當然係羅馬，睇近態有追貼米蘭雙雄之勢，博佢明日贏錫耶納兩球開「主勝」。
勢破米蘭連贏位
羅馬對上一次攞意甲係「巴迪高」、中田英壽等人壓陣嘅9年前，被北方強豪壟斷咁多年，當然想突破。追追下，原來佢哋只係落後少踢一場嘅次席隊AC米蘭2分，未必冇得追，至少打破米蘭連贏位都好呀。托迪上場後備入替傷兵東尼即刻做到嘢，配合近態勇嘅迪羅斯、柏路達、胡仙歷同埋上場玩謝祖記嘅懷斯，錫耶納有難。呢隊榜尾隊上場對卡利亞里明明領先都要嘔番兩分出嚟，而今季10場作客失25球，真有求必應。
拖埋列斯聯諾域治
博彩有句術語叫猛虎回頭，我信英甲嘅列斯聯經過上場慘吞史雲頓3蛋後，今晚應該可以贏高車士打開熱W；同樣可信嘅係近期英甲主場王諾域治，斷估主場對弱勢嘅哈特普爾好難會斷路，如果嫌太熱可以主攻今場波膽，1:0、2:0應該是旦開一瓣。
一個月飛快過去，呢個月啲波其實幾難玩，小弟上次有幸命中修咸頓越級挑戰葉士域治嘅平手盤同波膽後，連本執番近$5,000，唔計今次個本已幫〈開倉〉上番$92,000，多過我接手之時，希望波友收貨，今次食埋尾糊就正囉。
藍鑽石
近5場往績：WWL/L