左丁山一時興起，到西雅圖遊飛機河。
臨上機前一晚，收到教授L電郵，先至省起佢就係以西雅圖為家嘅，立即回郵，問佢是否可以一有空一齊吃個早餐，教授L三分鐘後回覆話得，但可唔可以同老總S一齊嚟呀？唉吔吔，老總S噃，自電台退休後，常居美國，原來就係以西雅圖為家，見埋佢一面，梗係好啦。
次日星期六下午上機，吃過晚餐後，倒頭便睡，一宿無話，抵達溫哥華係當地時間上午十一點幾，迅速通關，等齊人約莫係一點，上旅遊巴士直奔西雅圖，十個字後到達邊境過關。美國關員驗護照左驗右驗，兩隻手掌打齊手指模，跟住要除眼鏡影相，將護照在電腦旁邊刷一刷（swipe），OK掂晒，以為可以過關啦，點知關員話：「到我後面攞張綠色表格，填好之後再嚟見我！」有冇搞錯呀，我哋排隊呆等之時就唔派表格畀我哋填，驗完護照先至要我哋填，唔符合「組織與方法」（organizationandmethods）嗰一套噃，不過美國移民官全世界最惡，問多兩句，畀佢叫入房咪大件事，唯有照做。如是者，過咗一個鐘頭，全部人過晒關，上車之後點人數，咦，發覺排隊最後之律師M夫婦仍然坐在裏面，急忙查詢，原來夫妻兩人一齊過關，律師M打完手指模，影完相之後，關員竟然將M太太之護照在電腦旁一刷，電腦立即發出警告，指出護照與手指模並不吻合，要扣查。關員知道自己出錯，為之目瞪口呆，不知如何是好，請出波士，波士亦不知如何是好，如果波士有權向電腦發指令更正，再來一次咪冇事囉，但佢哋做唔到噃，如是者成為僵局，大家呆坐多一個鐘頭，關員卒之放走律師M夫婦上我哋架巴士。美國人成日話嚴守邊界防範恐怖分子，正是賊就未必捉到，平民就畀佢哋煩到嗌救命。以後夫婦兩人到美國，最好都係前後腳過關，唔好兩人一齊站在關員面前，同時交兩本護照畀關員，呢啲仁兄仁姐未必係好醒目o架！