希臘財政危機已有被市場「放大」之感，資金湧入美元避險，港股彈完又跌過，昨日2萬關口曾再度失守，尾市跌幅收窄，收報20121。
持續不斷的跌市消磨散戶炒股意志，即使有逆市奇葩出現，都唔係好敢追貨。好似長城科技（074）的深A附屬公司長城電腦發盈喜，刺激長城科技昨日無視淡風吹襲，炒上6%，收報3.32元，論表現已算難得，因為近期唔少上市公司即使發盈喜，股價一樣照插可也，長城科技嘅表現算係對捧場股民有交代。
長城電腦預告去年全年淨利潤最多可達3.9億元人民幣，增逾18倍，主要受惠營運效率及產品盈利能力提升，令主營業務利潤急增。其實，長城科技除擁有長城電腦外，旗下同在深圳掛牌的長城開發係智能儀錶先驅企業，兩項權益夾埋市值超過百億元，而長城科技本身市值僅40億元，可見股價有大幅折讓，現價極度偏低，未反映其實質價值。
長城科技產品有九成以上出口，金融海嘯當然對其業務有影響，但從其附屬最新公佈數據已見到情況大有改善，業務增長回勇，股價轉強不無道理。
方星俠