索K司機瘋狂駕駛的新聞，令30歲王建華想起帶着兒子（現年7歲）索K飆車的荒唐歲月。浪子爸爸索K約8年，其間經常駕駛小型貨車送客人到地盤視察。兒子由兩歲開始被迫與索K爸爸一起飆車，最高時速130至140公里，有時嚇得扯着安全帶全身發抖，有時狂哭，有時着急向已經失控伏在軚盤上的父親大叫：「爸爸，爸爸，開車嘞！」
嚴重時一天索K數十次
王建華多年來犯事無數，七入監房，七次戒毒，每次都失敗，兩周前，他在基督教新生協會戒毒村「方舟行動」完成為期半年的福音戒毒，靠着宗教力量脫離毒海，現時任地盤工人。
索K爸爸王建華的父親、外公以及細舅父都有黑社會背景。他小時候活潑聰明，考試總在三甲以內，四年班父母離異，從此，夜裏再沒有鬍子爸爸的親吻，他變得反叛，至中二輟學，曾任職裝修及修車師傅，其後駕小型貨車送客人視察地盤，8年前開始吸食各類毒品，最厲害之時，一天索K數十次，在家裏索，在車上索，停車又索，去蒲時會索，工作之時也會索，「佢（兒子）見到，就會擰轉面唔睇。」
兒子跟着索K爸爸度過數年危險的車上日子，不知多少次，王建華失去控制能力，伏在軚盤前，綠色交通燈亮了，兒子只好本能的對着父親大叫，「爸爸快啲開車！」有時索K後衝紅燈，小男孩嚇得緊緊捉住安全帶不放，「抱佢落車，佢成個震晒！」
浪子爸爸潛意識渴望父愛，即使要工作、要蒲，他都不肯拋下兒子，寧願帶着兒子駕車運送毒品，「有次我放低佢喺車，一個鐘頭後先返嚟，佢喊到冇晒聲。」兒子現在每當獨自一人就會非常害怕，受蠱惑仔生涯影響，小男孩有時講大話面不改容，令王建華現在後悔得很，最怕是：「好驚佢會學我索K，真係好驚！」
倫常親情不揀人，再壞的壞蛋也會愛，也會被愛。王建華從小就覺得會築橋起樓的父親很了不起，反叛是希望引他注意。「兩年多前，我索K，食丸仔、可卡因兼白粉，最終暈咗，細佬揹我入醫院，醫生話我救唔番，叫晒啲家人嚟睇我。阿爸嚟到，個樣好惡，但依然同醫生講：『唔該你救番我個仔啦！』」出死入生，父親天天探望，替他抹身、買好吃的食物，「出院之後，我又係咁，佢就冇再理我！」
愛兒一番話上人生一課
半年前，他犯事刑滿，感化官叫他嘗試福音戒毒，入戒毒村前，他致電父親：「佢好冷漠咁講：『希望你得啦！』」但兒子跟他講另一番說話：「爸爸改番好就得，冇事出番嚟，同我一齊。」結果，王建華人生重要一課，由7歲兒子而來。
多年來販毒、吸毒、搶劫、爆格、偷車，王建華以往把愛他如命的外公外婆以及媽媽的心傷透，「阿婆阿媽對住我喊叫我改，我都無動於衷，一滴眼淚都冇流過，但係個仔咁同我講，我好開心，流眼淚。」
1月11日，王建華成功戒毒重新生活，這兩周也有駕車送兒子返學放學，「最多開70公里，個仔唔再驚，仲好開心。」結果，兒子又跟他說：「爸爸，我愛你，好鍾意家嘅你。」悔改爸爸高興時，也像小孩子一樣：「係遺傳，我鍾意老竇，個仔又好鍾意我。但係爸爸仍然對我好冷淡，惟有做好啲，就算以後佢唔再愛我，都唔好好似家咁。」浪子心聲，希望會有完美結局。
記者：冼麗婷