尼泊爾裔男子林寶去年3月被警員開槍擊中頭部身亡，有份代表遺孀嘅大律師潘熙，今個月初「忽然」不再代表遺孀，遭死因裁判官吳承威批評，指潘無事先通知死因庭，吳官更表示會向大律師公會反映事件。
八方聽聞潘熙對吳官言論好驚訝，事關佢在去年12月24號，已去信死因庭解釋因其他官司繁忙而不能繼續代表林寶遺孀出庭，所以唔知點解吳官咁講，唔知情者，聽完一面之詞，可能以為潘熙真係咁不負責任。知情人士同八方講，潘熙事後向大律師公會尋求協助，希望討回公道，事關錯不在他，呢隻死貓點都啃唔落。死因庭噚日繼續聆訊林寶死因，吳承威開庭時指已從大律師公會方面得到合理解釋，潘熙無錯，所以唔會向公會投訴。潘熙沉寃終於得雪。潘熙專打人權案，經常代表社運人士出庭，最經典係代表盧少蘭打反對領匯上市司法覆核案。