五個議員辭職剛剛生效，兩黨未正式宣佈派人參加補選，已經有人搶閘揳位，地產業界愛國會前日決定支持會員莫育民出選港島區，稍後會搵多四個人出選其餘四區。
現年42歲嘅莫育民已婚，育有一子，因家住港島所以喺自己地頭參選，冇政黨背景亦冇參選經驗，處男下海參選，係因為不滿泛民搞亂香港，也睇唔過眼建制派所為，決定「為自己、為沉默大多數發聲。」政綱以民生問題為主，少談政治。
不理中方朋友勸喻
莫育民係專收舊樓嘅田生地產經紀，閒時會在網台主持鬼古節目，莫育民聲稱未通知老闆同太太已決定參選，如果老闆唔鍾意佢參選，可能要辭工，「我家有惡妻，要鼓足勇氣先敢返屋企同老婆講。」佢又話有「中方朋友」勸佢唔好參選，不過佢冇理會。
從政犧牲大，好彩莫育民朋友夠義氣，地產業界愛國會前日開會即場籌到30萬元經費資助佢參選，有呢筆「安家費」，相信莫育民無後顧之憂。地產業界愛國會08年成立，曾組織隊伍護送奧運聖火在港傳送。