獅子行回家，聲勢一時無兩，滙控（005）行政總裁紀勤噚日繼續忙忙忙真人show。滙豐係城中第一大行，佢哋嘅大客包括富豪巨賈、跨國企業，數埋一大籮，噚晚紀勤就喺滙豐中環總行28樓舉行酒會，出席嘅大孖沙絡繹不絕，賓客百幾二百人，滙豐高層好似鄭海泉、霍嘉治同王冬勝等人，都有在場招呼，紀勤再度發揮大中國本色，用唔鹹唔淡嘅廣東話講「生意興隆」做開場白。
親臨畀面派對嘅名人，據聞有彤叔鄭裕彤、小小超李澤楷、港交所（388）主席夏佳理、印度富商夏利里拉、和黃（013）財務董事陸法蘭、蘭桂坊之父兼海洋公園主席盛智文，同長實（001）執董葉德銓等。
唔知係咪華華眼大睇過龍，定係首富李嘉誠同李澤鉅父子有要務纏身，紀勤酒會未見超人蹤影。華華相信，以超人同滙豐咁深厚情誼，紀大班可能一抵步已同佢飲中國茶敍舊，蓋當年獅子行仲未遷冊，前大班浦偉士一直喺融資上支持超人王國，成就winwin局面。