出得嚟行，預咗要還，前日好「英」咁拉隊離場搞到流會嘅民建聯主席譚耀宗，話口未完噚日就現眼報，長毛趁未失去議員身份，噚日下午出席《最低工資條例草案》委員會會議，開會時突襲主持會議嘅譚耀宗，直斥佢係狗兼送上一大一細兩嚿道具骨頭，諷刺佢同黨羽分沾權貴賞賜骨肉津津有味。
君子報仇十年未晚，長毛噚日冇急於發難，等到譚耀宗點名叫佢發言時先拿出兩根骨頭，再讀出針對譚耀宗對聯，「一犬吠日，百犬吠聲，群首立功應獨享；我要風骨，你要肉骨，隨從附和宜分沾。」長毛解釋，阿譚是「群首」，本應獨享一根骨頭，但由於其他隨從跟佢一齊離場，在主子眼中亦應論功行賞，所以佢預備一大一細兩嚿骨，大嘅送畀阿譚，細嘅益民建聯黨羽，人人有份。
譚耀宗：你唔好埋嚟
長篇大論後，長毛離座將兩嚿骨頭擺在阿譚面前，阿譚唔似得曾鈺成咁見慣大場面，嚇到驚叫：「你唔好埋嚟，你家係咪恐嚇我。」長毛懶理阿譚鬼殺咁嘈，指住佢鬧，「你噚日好似隻狗咁樣。」放低骨頭後，長毛施施然離場，可憐阿譚驚魂未定，口震震大嗌「休會」。堂堂黨主席被鬧係狗兼收狗骨，真係情何以堪。
正當長毛進行落任前最後一擊之際，毓民同陳偉業就談笑風生同立法會秘書處職員話別，可能已置輸贏於度外，兩人一副千山獨行不必相送嘅豪邁表情，反觀公民黨陳淑莊、梁家傑心情卻好沉重。陳淑莊同梁家傑買咗10罐JennyBakery嘅曲奇餅送畀秘書處職員同主席曾鈺成，唔知係咪暗示後會有期。
梁家傑陳淑莊眼紅紅
梁家傑初時表現正常，送完餅後情緒越嚟越激動，臨離開時直情眼都紅晒，八方見佢有泡淚水喺眼眶吓，佢話入會五年，職員對佢好好，驟然離任，真係覺得好唔捨得。只係做議員年幾嘅陳淑莊一直有講有笑，聽完傑哥深情表白，都忍唔住眼紅紅，但信已遞、職已辭，冇得返轉頭，前面要做嘅就係公投。
mailto:[email protected]