後金融海嘯期，實體經濟復蘇緩慢，失業率仍然高企，環球保護主義更加係有增無減，而且花樣多多，背後嘅藉口亦好新鮮，好似美國政府鼓吹買美貨，解釋嘅原因之一，就係怕美軍冇衫着。
利豐（494）董事總經理馮國綸近日就保護主義喺一個論壇上發表演說，佢話家環球貿易減少，除咗因為經濟差，仲有就係貿易保護主義抬頭，當中包括政府對貿易市場嘅干預；好似美國政府要求買美軍嘅制服，一定要買美國造嘅，因為擔心一旦打仗，可能會影響外國貨嘅供應情況。
馮生又話，近年亦流行一項新變種保護形式，就係藉詞全球暖化，要減低碳排放，要求徵收碳關稅，實質係要提高進口貨門檻，同傳統嘅徵收反傾銷稅，可以話有異曲同工之效。
事實上，除咗貿易領域之外，佢仲話金融領域亦有保護主義嘅出現，因為唔少歐美銀行透過政府，用納稅人錢求翻生，政府要求佢哋先借錢畀本地企業，減少對外資企業借貸。