世事無奇不有，離開過港交所（388）兩次、主管結算嘅老臣子盛善祥舊年3月底退休，一年唔夠，下月1日就復出，擔任港交所顧問。
李小加邀摩通舊部加盟
同時，行政總裁李小加請咗喺摩根大通嘅舊同事羅力（RomneshLamba）過檔，出任市場發展執行總監；呢兩個位都係新開，新人舊人都有，夠晒平衡。
喺任何機構都一樣，新人事新作風，自從財務總監詹德慈決定跟住前行政總裁周文耀離開港交所，市場都估到港交所內部高層將有變動，李小加要建立自己嘅班底都係理所當然。
羅力94年嚟香港工作之前，喺美國已經做咗9年，又喺美林亞太區工作8年，出任董事總經理及中國業務拓展營運總裁，08年底開始係摩根大通亞洲（日本除外）企業財務及資本市場業務高級顧問，負責策略規劃。據聞李小加新開個位畀羅力，就係要佢幫手諗吓港交所未來發展方向同策略。
其實都啱嘅，李小加最近先講，以前中國經濟發展需要資金，香港市場俾內地企業嚟上市集資；家成個形勢變晒，中國富起來，要諗吓點樣將財富增值，香港就要諗啲產品出嚟俾內地人投資，的確需要更有市場觸覺、有新思維嘅人參與管理先得嘅。
mailto:[email protected]