馮仁昭四圍超：超雲探病陪賭王打牌 - 馮仁昭

賭王何鴻燊住院半年，姨太仔女日夜陪住，據悉農曆新年前賭王就會出院。三房大女何超雲之前拎過賭王嘅西裝畀白龍王祈福，早輪又拎咗賭王嘅睡衣再去拜見白龍王。

皮膚靚感激父母

超雲噚日同佘詩曼及前港隊泳手蔡曉慧等，喺中環出席Chanel美白護膚活動。佢着住露背短裙，講明唔答有關白龍王嘅嘢，但就好大方分享護膚心得。超t雲話繼承咗爸爸嘅薄皮膚同媽咪嘅白騐，佢話：「媽咪皮膚都幾好，我就易敏感。食得淡啲，就會少出粒粒。」
有電子傳媒嘅記者問超雲賭王幾時出院，佢初時拒絕上鏡，但知道記者嚟自澳門後，即時優待開腔話：「爹哋好番好多，希望可以一齊食團年飯。」問佢何家日日去探病，其實有乜嘢做？超雲話：「打麻雀，同媽咪陪爹哋打，爹哋贏多，佢好好彩o架。」
超雲出席完活動，即時去咗醫院會合同樣係雀腳嘅三姨太陳婉珍，由一點半坐到五點半，如果打牌，相信佢哋最少可以打到四圈。