繼Google撤出內地之後，又一網站被迫消失於神州大地。呢個唔係搜尋網，唔係討論嚴肅政治話題嘅網站，亦都唔係類似facebook嘅社交網，只不過係暢談郊遊樂趣嘅「上山下海俱樂部」。據網站內嘅多位網友所講，最近喺內地已經上唔到呢個網。
網友研究死因，有人話自從上年六四前開始被封殺。「上山下海」網站嘅討論區，有人講過六四，有網友話去年喺北京，特登試下click入講六四嗰頁，之後就開始上唔到「上山下海」嘞。八方思疑，「上山下海」個名太過近似五、六十年代蔓延全國嘅「上山下鄉」運動，呢場運動對全國知識青年以至佢哋嘅家庭帶來極大傷害，可能共產黨唔想內地網民勾起歷史傷口，所以好心封殺啫。