護士人手唔夠嘅問題講咗咁多年，醫管局都解決唔到，過去三年走咗2,000幾人，護協終於忍唔住，繼80後包圍立法會，白衣天使都來個包圍醫管局行動，今日趁醫管局開大會去圍佢，仲要送個鬧鐘畀主席胡定旭同總裁蘇利民，鬧「醒」佢哋要留人，如果唔係培訓多年嘅護士人才就係不斷流失。
護協今日喺報紙登廣告，質問「醫管局，你『醒』未？留人喇，快！」唔好再係咁搞埋啲凍薪、取消跳薪點，搞到護士做到冇晒心機。協會約定護士今日3點醫管局見，齊齊發聲要求挽留護士。講真，大家都唔想見到再有護士好似瑪麗醫院手術室護士咁樣集體請病假，亦唔想因為人手問題搞到打錯針派錯藥，肥胡聽日收到個「鬧鐘」之後，要認真啲同董事局成員度番幾條好橋，安撫吓班護士喇。