80後呢一代，好多人未真正聽過黑膠！最近TEAC再玩懷舊，咪睇小LP-R500只係普通黑膠唱機，除內置卡式錄音帶及收音機之餘，仲具備一個可錄音嘅CD唱盤。最佳玩法，莫過於先將經典黑膠錄製成光碟，慢慢細味，繼而永久封印，好好珍藏喇！
記者：陳國輝
攝影：周旭文
Model：Norain@PureModels
鳴謝：香港環球唱片
一件玩齊老中青
機頂一個茶色透明膠殼，配搭黑色正方形機身，已Classic到不得了，加埋10.5kg巨無霸身形，諗住用佢煲碟，不如擺屋企做裝飾好過！當然，個Look啱唔啱睇好主觀，但功能就同傳統黑膠唱機有好大分別。最直接係加入CD，唔單止可以聽一般CD格式，就連MP3/WMA等電腦Format都唔放過，食齊老中青三代音樂發燒友口味，諗得幾周到喎！
黑膠靚聲好柔和
對於無聽開黑膠嘅人，LP-R500可能毫無刺激！高音唔夠尖，低音又唔夠重，想炸屋？更加咪使旨意！當然，去到數碼音樂年代，要求都唔一樣，呢款黑膠唱機畀我嘅感覺係聲音特別柔和，好適宜聽慢歌或節奏明快嘅音樂，特別係今次試聽《問我》原唱歌手陳麗斯嘅黑膠碟，靈魂似飛返回七十到八十年代，聽落好舒服，根本唔會去諗Bass夠唔夠力水嘅問題。
㩒掣直錄夠簡單
撇除對黑膠唱機嘅欣賞態度，講實用，必定係錄製CD功能！機身正中間有個CD唱盤，只要放入一隻CD-R/RW，再按側邊粒REC掣以及播放/暫停，就可以選擇自己鍾意嘅歌曲嚟燒錄，操作容易，自由度亦相當大；至於錄製後嘅取樣頻率，官方就話有44.1kHz，相等於CD嘅標準，唔想隻珍藏黑膠咁快被玩殘，燒成光碟係最好辦法。
Profile
播放種類：黑膠、卡式
錄音帶、CD
端子：AUXIn/Out
體積：470×236×360mm
重量：10.5kg
功能：錄製CD、紅外線遙控、播放MP3/WMA、內置FM/AM收音機、自動/人手增設錄音曲目
原音（28450813）