本港適齡入學小朋友買少見少，教育局局長孫公噚日話，將來有中學可能要步小學後塵縮班殺校。
講到殺校，八方即刻諗起當年收到「死亡帖」但最終翻生嘅鮮魚行學校，校長梁紀昌噚日同八方講，學校上年11月接受教育局校外評核，份評核報告啱啱出爐。
份報告指鮮魚行學生讀書叻又有禮貌，學校持續發展不斷進步，其中以籌款能力最優秀，又特別讚賞梁校長，指佢有理想又有抱負，敢於創新又有領導能力，係學生嘅「校長爸爸」。
八方記得，當年教育局對鮮魚行「殺」之而後快，更鬧學校「缺乏誠信極度遺憾」，今日學校獲盛讚，係校長師生好多年努力嘅成果。