退休後未能「hea」嘅金管局前總裁任志剛，噚日喺個人網誌「正式」發表文章，好似以前喺金管局網站寫《觀點》，公開個人睇法。針對上星期內地可能用上海做試點，准個人喺海外投資，阿任認為一旦實行呢個類似「港股直通車」，能收「藏滙於民」效果。
阿任話，內地儲蓄率冠全球，市民如果可以投資海外爭取更高回報，對外幣嘅需求亦增加，有助減低中國外滙儲備嘅累積，以免中央太多「彈藥」，搞到金融管理、滙率等政策出現困難。截至去年底，內地外儲已接近2.4萬億美金！但阿任話仲未掌握最新發展嘅內幕，但估計准市民海外投資係內地金融改革嘅重要項目；潛台詞即係有可能發生，只係唔知幾時。