當差分分鐘面對危機，噚日凌晨有警員疑被車禍女司機兜巴星，透過新聞片段可清楚聽到清脆玲瓏嘅掌摑聲，市民睇完新聞後議論紛紛，喺網上發表對事件睇法，好多人對於被摑警員事後表現十分多疑問，認為佢被打後等咗一秒先顯示不適，再慢慢跌低，實在太富戲劇性，八方覺得警員態度克制，對市民真係好器量。
陳淑莊：應掰大口
八方慶幸冇乜機會俾人兜巴星，唔清楚俾人打會有乜反應，而根據星爺喺《喜劇之王》入面講嘅史坦尼斯拉夫斯基的演技理論，真正嘅痛楚，應該係由外而內，再由內而外表達出嚟，因此警員被打後遲一秒先有痛苦嘅反應，係正常嘅生理現象。
身為專業舞台劇演員嘅公民黨陳淑莊，噚日睇完新聞後，以一個受過專業戲劇訓練嘅人，就事件提出少少評論，陳淑莊指一般人無端端俾人兜巴星，「應該只係識得掰大個口得個窿。」如果以此做標準，八方都認為事件中警員反應似乎比較誇張，即係over咗。
不過，陳淑莊強調每個人被打後，做出嘅反應都唔同，「要睇成件事來龍去脈，唔可以一概而論，仲要睇吓個人係唔係成日俾人打，因為內心情緒會有唔同變化，做出嚟嘅反應都會唔同。」聽完陳淑莊嘅專業意見，唔知被打警員或其他警員有冇得着？定係學大Sir古樹鴻話，講聲Happynewyear啫！
醫生：係正常反應
八方始終關心被摑警員多啲，耳鼻喉專科醫生顧德政同八方講，被人兜巴星後果可大可小，如果打正耳仔位置，掌摑壓力可能會打穿耳膜，嚴重者會當場流血。如果係強力掌摑，顧醫生話有機會損壞聽覺神經，聽覺可能永久受損，如果打歪耳骨，後患更嚴重，做手術都未必可以完全恢復聽覺。
顧醫生都有睇新聞，佢話警員被打後冇即時跌低，隔一秒先覺得頭暈都算係正常反應，「雖然睇落去，嗰一巴唔係好大力，但如果打得應，係有可能覺得頭暈。」醫生又話被掌摑受傷唔罕見，平均兩星期有一單搵佢睇症，主要係被父母打嘅細路，其他多數係被男、女朋友動手個案。
mailto:[email protected]