喺後金融危機時期，全球重新塑造新經濟架構，究竟未來世界有乜商機？港鐵（066）主席錢果豐噚日喺「金融危機與復甦」研討會度，畀咗貼士大家。
錢主席預期，互聯網繼續為未來世界提供新商機，每朝早佢枱頭都有份英國《金融時報》，但佢相信10年內會轉用Amazon旗下電子書閱讀器Kindle睇電子版報紙。如果人人都學佢咁，我哋做報紙嘅都咪話唔驚。錢主席又預言，未來睇戲唔使入戲院，而係經網上播放，咁全世界人咪可以一齊睇首映？
隨住亞洲大國崛起，各有超過十億人口嘅中國同印度，當然係全球勞動大軍，未來50年全球工資面臨下調壓力，佢估要加薪都幾難。而金融海嘯之後，各國無可避免加強監管，全球會因為美國人減少消費而令整體需求下降。
另一個受高度關注嘅題目就係環保，佢預期未來20年大家要為碳排放付出代價，即係要收費啦！至於人越嚟越長命，會對下一代嘅健康更關注，咁就有商機。而全球安全要求繼續提高，機場擺更多檢測機，增加運輸成本，呢樣會影響人流同貨物。
李華華
mailto:[email protected]