貌似言承旭嘅亞視新人王羅力威，上月初喺《亞洲星光大道》勝出後，雖然有傳佢態度囂張，但佢就繼續我行我素。上星期羅力威再度拍攝《現實不重要》MV，女角就係翻版大S李莉琳（Liz），點知當日羅力威喺元朗拍攝現場意見多多，黑面發脾氣又扮大牌，搞到不歡而散。
「我做唔到嗰個樣」
嗰日導演要求羅力威扮癌症病人咳出血，佢就嫌三嫌四，話要扮心臟病患者，又唔肯為劇情咀Liz，甚至話故事幼稚，表現極唔合作。噚日羅力威現身亞視總台時就直認拍MV唔愉快，同導演欠溝通，佢話：「首歌係可以放喺任何傷感嘅情節上，但同愛情冇關係，好似唔係你死就係我亡，第一次拍MV女主角死，第二次MV就係我死，導演要我咳出血，我做唔到嗰個樣，於是同佢講扮心臟病發囉。」
羅力威又承認自己唔肯咀Liz：「我唔想錫，係個人問題，冇話點解。」至於有冇黑面，佢話：「我個面平時都係咁黑o架啦，但諗番件事，我知我好錯，我知我嘅任性令大家唔開心，工作冇咁順利，我想喺度同當日現場嘅人講sorry，我會學習點樣面對問題同埋人際關係，自己係後知後覺。」Liz前晚就話：「嗰日羅力威同導演係有意見，但佢出咗名冇表情，我又唔覺佢扮大牌。」
期待同Eason切磋
雖然羅力威是非纏身，但仍受亞視寵愛。噚日亞視宣佈大年初三喺九展舉行一場「星光家族音樂會」，羅力威會率領亢帥克、陳蕾同蔡梓銘等演唱。對於陳奕迅（Eason）下月亮相亞視，羅力威話公司的確有提過，自己都想同Eason合作。