陳柏霖和名模女友MandyLieu一向煙韌恩愛，但MandyLieu昨日突然宣佈和陳柏霖達成協議，已和平分手，她傷感透露因二人分隔兩地，聚少離多，決心結束三年情，堅稱分開不涉第三者。
昨日穿上清新白裙的MandyLieu，在中環出席名牌SalvatoreFerragamo香水發佈會，她初時興致勃勃大談拍飲食節目，試食過黑松露菌宴配紅酒的團年飯，又回應JessicaC.人氣急升等話題。
每年都返馬來西亞過年的Mandy，今年竟然決定留在香港，年初一是情人節，問她與男友陳柏霖如何慶祝？Mandy即沉默一陣子，傷感地說：「我哋分開咗，呢個係我哋一齊做嘅決定，不過我哋都仲係朋友。」
傳桂綸鎂介入
因為分隔兩地少見面？Mandy點頭示意，她說：「我哋仲係好close嘅朋友，係和平分手。」陳柏霖有新女友？她說：「唔係，我哋無第三者，大家係好respect對方嘅，都係朋友。」她表示仍在習慣單身，今年情人節她有契媽來港陪伴。
陳柏霖和MandyLieu在07年中被影到拍拖行街，Mandy更樹熊式抱住男友，陳柏霖當時承認拍拖半年，之後兩人成為公開一對，不時晒恩愛，柏霖更為遷就女友，由台灣搬到香港，兩人已見家長，柏霖去年曾和桂綸鎂傳緋聞，但無損感情。不過，兩人工作各有各忙，Mandy曾透露有長達3星期沒法見男友一面，最終不敵經常分隔兩地而情盡，分手收場。
採訪、攝影：顏英儀