賀歲電影《花田囍事2010》一班演員出攬枕，擺明不讓o靚模周秀娜同鍾蕙芝（Lavina）專美。型男古天樂和新派笑匠鄭中基率領賀歲片《花》片一眾兄弟姊妹，人多勢眾推出約4呎長嘅巨型攬枕，硬撼性感o靚模。電影公司早前已分別為古仔、鄭中基、黃百鳴、楊穎（Angelababy）、熊黛林同吳君如選咗造型攞去造辦。
抽起全女班
不過，身為良家婦女嘅君如出攬枕，男友陳可辛知道後立即強烈反對，加上為免Angelababy同熊黛林嘅攬枕會俾人攞嚟同o靚模比拼，黃百鳴決定抽起全女班嘅攬枕，佢噚日話：「改為男子組全力出擊都唔錯，條橋夠晒新鮮。」
鄭中基仲牙擦擦向古仔同黃百鳴下戰書鬥好賣，古仔信心十足，佢話：「我會自己訂購一批，用嚟送畀fans做新年禮物，其中一個會送畀田蕊妮，套戲入面佢雖然係我老婆，但我為咗練功要禁慾，所以拍完都滿足唔到佢攬我嘅心願，惟有送個畀佢攬到夠。」
君如臨門一腳遭男友喝止出攬枕，佢話覺得好可惜，要求黃百鳴訂製兩個私伙攬枕畀佢珍藏，君如話：「我想用嚟送畀老公（陳可辛）同囡囡，等我開工陪唔到佢哋，都有個假身頂替。」
