台灣音樂才子陶喆愛音樂更愛媾女，出道以來媾女足迹遍佈中港台三地。繼月前本報踢爆陶喆在港跟美少女廚神岑潔儀（Zoey）又攬又啜後，上周他又在上海劈酒媾女。劈到半醉的陶喆，離開夜店後被發現與索女拖手，之後再一拖二趕下場，越夜越精采。對此Zoey昨日不僅與陶喆劃清界線，且更揶揄他說：「要檢點啲。」
現年40歲的陶喆，去年11月被本報踢爆暗撻22歲美少女廚神兼無綫女藝員岑潔儀，二人在港往酒店食完消夜後又攬又啜，親密關係盡在不言中。不過，才子愛風流，陶喆暗交Zoey後，仍不改愛蒲愛飲愛媾女性格，日前，陶喆往上海時又被發現夜蒲劈酒，飲到醉醺醺後更拖女離場。
醉醺醺拖女落樓
上周二晚，穿上恤衫黑背心襯牛仔褲的陶喆，偕大班友人到劉嘉玲在上海投資的夜店Muse消遣，一行人玩到凌晨3時左右才離開。現場所見，陶喆劈酒劈到醉醺醺，落樓梯時要由夜店保安人員攙扶。
不過，陶喆左手邊由保安攙扶，右手邊卻拖實一位身材高䠷的索女，陶喆跟索女拖了好一會才鬆手，然後右手插袋。至於該索女一直用圍巾遮掩面容，直至走到樓梯中間才露出俏臉，原來該索女不僅比陶喆高出近半個頭，而且更樣貌娟好，看似是陶喆一向鍾情的女模一族。
其實除圍巾索女外，還有一名手挽LV名牌袋的短髮靚女低調同行。陶喆偕圍巾索女及短髮靚女等友人登上七人車後，逐一送友人回家，並在上海新華路附近落車跟友人擁抱講拜拜，表現得相當熱情。之後，陶喆再偕兩索女往下場，果然是越夜越精采。
Zoey：要檢點啲
記者昨日致電Zoey，問她可知道陶喆在上海夜蒲媾女時，Zoey在電話揶揄說：「點解佢成日都畀人影到，我覺得身為公眾人物就唔係咁好，要檢點啲，或者嗰個（指與陶喆拖手的索女）係佢嘅真命天子，因為陶喆都好想結婚。」
問到陶喆可曾求婚時，Zoey說：「佢都係一個好好嘅結婚對象，條件咁好，不過我自己仲細，未準備好。」Zoey言語間直認曾與陶喆地下情，她說：「同得男仔攬過錫過，話唔係男友都冇人信，我要保護佢先否認。」
可是Zoey直指忍受不到陶喆的花心，所以才把他降呢，她說：「所以佢家做乜，我都冇乜感覺，其實佢啲嘢真係唔關我事，唔想每次佢有緋聞，我都要幫佢回應，奉勸佢下次同女仔去街要小心啲。」Zoey表示與陶喆再見亦是朋友，大家偶爾會在網上聯絡，陶喆下月2日和3日在灣仔會展舉行個唱，Zoey更買了票前往捧場。
陶喆昨透過友人回應，表示當天是請日本導演食飯飲酒，商談他的電影計劃，對於兩名索女身份以及與她們的交情則未有交代。
採訪、攝影：盧健
話你知：Muse酒吧明星最愛
陶喆日前與兩女談心的上海Muse酒吧，位於上海靜安區余姚路74號，乃劉嘉玲於06年與友人合資1,600萬人民幣開設，酒吧樓高兩層，面積共1,500平方米。由於挾着明星效應，酒吧的生意客似雲來，更不時有明星光顧。每逢劉嘉玲生日，她總愛相約圈中友人到酒吧消遣，玩個不醉無歸，08年10月酒吧開業兩周年，陶喆也有到場參加派對，絕對是熟客仔。
有情歲月：女模殺手嗒盡中港台
女伴如車輪轉的風流才子陶喆，素有「女模殺手」之稱，特別鍾情身材高䠷的女子，他的女友清單遍佈中港台。
殷悅（Melody，31歲）
參加美國華埠小姐奪第一名，03年與陶喆分手，陶喆以她的名字創作歌曲贈給女方，現已嫁給富商吳育奇。
林若亞（30歲）
有「超級發電機」之稱，因擔任陶喆《討厭紅樓夢》女主角而傳緋聞，兩人曾在台北街頭胸貼胸熊抱。
白歆惠（27歲）
05年加入凱渥公司當模特兒，06年拍MV與陶喆撻着，後更被拍得與陶喆及雙親在台北打邊爐。
楊俐思（Liz，27歲）
台灣加巴拉圭混血女模，07年與陶喆傳出緋聞後人氣急升，早前陶喆為演唱會綵排，Liz更被拍得低調探班。
岑潔儀（Zoey，22歲）
香港o靚模，早前被本報踢爆與陶喆在洲際酒店深宵蒲吧，陶喆更狼擒Zoey啜啜攬攬。
資料來源：《蘋果》資料室
