長毛為聲援劉曉波，噚日聯同幾名四五行動成員，合共6個人咁大把到中聯辦請願，要求中共政府停止以言入罪，釋放所有政治犯，誰知警方竟出動多達40名人員招呼。有警員喺長毛未有乜嘢行動前，已極具「挑逗」咁企到埋一埋拍攝，十多名藍帽子亦喺閘外築成人牆同架起鐵馬。
閘外遞信都唔得
警方動用大批警力兼職中聯辦保安，搞到早排鬧示威者「仆街」兼自稱共產黨員嘅中聯辦女保安員「鐵欄花」，噚日全程無用武之地。
長毛原本諗住將封請願信如常放喺中聯辦閘外，點知成班藍帽子即刻推開佢，話唔可以過界。中聯辦一名男保安更突然開着大聲公，大嗌「警告！任何人士，不可在中聯辦範圍拋出任何物品，否則我哋會向警方投訴，當垃圾處理！」中聯辦作為中央駐港機構，如此賤視民意，難怪長毛發火，高呼「中聯辦縮頭烏龜！」並抗議香港警方浪費警力，搞到市民喺閘外遞封信都唔得。